ហាណូយ៖ កីឡាការិនី កូនខ្មែរ-អាមេរិក ខាន់ ចេសា ជាអ្នកតំណាងឱ្យកម្ពុជាកាន់ទង់ជាតិរូមជាមួយនឹងប្រតិភូ និងអត្តពលិកកម្ពុជា ចូលរួមពិធីបើកការប្រកួតផ្លូវការ នៃព្រឹត្តិការណ៍កីឡាស៊ីហ្គេម លើកទី៣១ នាទីក្រុងហាណូយ នៅរាត្រីថ្ងៃទី១២ ខែឧសភា ឆ្នាំ២០២២ នេះ។

ពិធីបើកបើកការប្រកួតផ្លូវការ នៃព្រឹត្តិការណ៍កីឡាស៊ីហ្គេម លើកទី៣១ បានធ្វើឡើងក្រោមក្រសែភ្នែកអ្នកចូលរួមប្រមាណជា ២ម៉ឺននាកីឡាដ្ឋាន My Dinh ទីក្រុងហាណូយ ប្រទេសវៀតណាម ដែលតំណាងជាតិនីមួយៗនៃប្រទេសទាំង ១១ ចូលរួមព្រឹត្តិការណ៍នេះ។

ខាន់ ចេសា ជាកីឡាការិនីជឺជិតស៊ូជម្រើសជាតិកម្ពុជា ម្ចាស់មេដាយមាស Pan Jiu Jitsu 2022 ឬ Brazilian Jiu-Jitsu Pan American Championship 2022 ដែលជាគាត់ត្រូវបានស្ថាប័នកីឡាជឺជិតស៊ូអន្ដរជាតិ ចាត់ទុកជាកីឡាការិនីលំដាប់កំពូលម្នាក់នាពេលបច្ចុប្បន្ន បន្ទាប់ពីនាងបានវិវត្តន៍ខ្លួនយ៉ាងឆាប់រហ័ស រហូតទទួលបានខ្សែក្រវ៉ាត់ខ្មៅ ក្នុងនាមកីឡាការិនីវ័យក្មេងជាងគេលើពិភពលោកត្រឹមវ័យ១៨ឆ្នាំ កាលពីចុងឆ្នាំ២០២០៕